無招勝有招

香港有優勢 2011年03月03日
點解在金融業之中，香港精英未必夠北方精英爭？左丁山諗有兩個主因，其一係內地人在本港金融界能佔高位者，例如北大/清華/復旦加學士加哈佛/耶魯/哥倫比亞 MBA甚至博士，與本港之中大港大科大加哈佛/牛津/劍橋畢業生相比，表面上無甚學歷差異，但內地高考生一年過千萬人，能得到上述資格者，萬中無一，直情係精英中之精英，而香港高考每年考生得幾萬人，睇比例已知道精英純度有所不如；其二係講關係，內地關係喎，香港生輸一百個馬位啦，根本冇得追，唯有認命，於外地回流之本港精英，中文程度有所不足，對國情所知更少，亦係難爭。
不過一位金融界高層對左丁山講：「本地生之最大優點係比較老實，依規矩辦事，唔會太多鑽空子，亂咁嚟，所以做做吓，做得唔太曳嘅話，容易得到上司信任，有一次我到上海，一位大客請我食飯飲酒之後，吐出一句真言：『你地香港人唔夠奸，好戇直，我地最唔奸嗰個都扭計扭贏你地最奸嗰個，你地根本唔識乜嘢叫做權術。』我聽完就驚咗一驚，返酒店房諗咗好耐，返到香港就召集一班香港仔、女講清楚，我地嘅競爭優勢可能就係戇直，唔夠奸，依本子辦事，尊重法規，你地上到內地做 deal，千萬不可試圖與內地人鬥扭計、鬥權術，一定要無招勝有招，否則會俾內地人扭到剝光豬。」
不懂中國歷史、不熟讀三國演義、水滸傳，點學人講權術 ABC呀，不過學識都係用來傍身嘅啫，叫做防禦性，點同經歷過文革、六四與自小學開始就識「賄選做班長」嘅人士鬥計仔啫。
反之，內地人嚟到香港做生意，覺得更容易，適應到極。一位內地建築商曾對左丁山騎騎笑：「香港啲官真係好，唔會麻煩我地，唔要我地應酬，有爭執，我地可以告政府，而且贏嘅機會唔細，內地再過一百年，都未必學到呢樣，呢樣嘢千祈唔好一國化！」此乃香港之真正優勢，為中國大陸與台灣所無，新加坡亦學唔到。新加坡政府與私人打官司，幾時輸過呀？